സ്പെയിൻ ലോക ചാമ്പ്യൻമാർ; ലോകകപ്പ് ആവേശത്തിൽ കേരളം, വിദ്യാർഥികൾക്ക് ഇന്ന് അവധി, പാലായിൽ പൊതുസ്ക്രീനിംഗ് ശ്രദ്ധേയമായി
(916)
1 Gram
(916)
8 Gram
1 Gram
പാലാ: ഫിഫ ലോകകപ്പ് 2026 ഫൈനലിൽ നിലവിലെ ചാമ്പ്യൻമാരായ അർജന്റീനയെ എതിരില്ലാത്ത ഒരു ഗോളിന് പരാജയപ്പെടുത്തി സ്പെയിൻ രണ്ടാം തവണ ലോകകപ്പ് കിരീടം സ്വന്തമാക്കി. നിശ്ചിത സമയത്ത് ഗോൾരഹിത സമനിലയിൽ അവസാനിച്ച മത്സരം അധികസമയത്തേക്ക് നീണ്ടപ്പോൾ 106- മിനിറ്റിൽ ഫെറാൻ ടോറസ് നേടിയ ഗോളാണ് സ്പെയിനിന് ലോകകിരീടം സമ്മാനിച്ചത്.
ലോകകപ്പ് ഫൈനലിന്റെ ആവേശം കേരളത്തിലും അലയടിച്ചിരിക്കെ, മത്സരം പുലർച്ചെയോടെ അവസാനിച്ചതിനെ തുടർന്ന് സംസ്ഥാനത്തെ എല്ലാ സ്കൂളുകൾക്കും കോളജുകൾക്കും ഇന്ന് സർക്കാർ അവധി പ്രഖ്യാപിച്ചു. വിദ്യാർഥികൾക്ക് മത്സരം പൂർണമായും ആസ്വദിക്കാനും ഉറക്കക്കുറവും യാത്രാക്ലേശവും ഒഴിവാക്കാനുമാണ് സർക്കാർ ഈ തീരുമാനം കൈക്കൊണ്ടത്.
സർക്കാർ തീരുമാനത്തെ സ്വാഗതം ചെയ്ത് പാലാ നഗരസഭാ ചെയർപേഴ്സൺ ദിയ ബിനു പുളിക്കക്കണ്ടം രംഗത്തെത്തി. വിദ്യാർഥികൾക്ക് ലോകകപ്പ് ഫൈനൽ കുടുംബത്തോടൊപ്പം ആസ്വദിക്കാനും കായികവിനോദങ്ങളോടുള്ള താൽപര്യം കൂടുതൽ പ്രോത്സാഹിപ്പിക്കാനുമുള്ള തീരുമാനമാണ് സർക്കാർ കൈക്കൊണ്ടതെന്ന് അവർ പറഞ്ഞു.
ലോകകപ്പ് ഫൈനലിന്റെ പിറ്റേദിവസം സംസ്ഥാനത്തെ എല്ലാ വിദ്യാഭ്യാസ സ്ഥാപനങ്ങൾക്കും അവധി പ്രഖ്യാപിക്കണമെന്നാവശ്യപ്പെട്ട് മുഖ്യമന്ത്രി, പൊതുവിദ്യാഭ്യാസ വകുപ്പ് മന്ത്രി, ഉന്നത വിദ്യാഭ്യാസ വകുപ്പ് മന്ത്രി എന്നിവർക്ക് ദിയ ബിനു നേരത്തെ നിവേദനം നൽകിയിരുന്നു. വിദ്യാർഥികളുടെ താൽപര്യത്തിന് പ്രാധാന്യം നൽകി സമയോചിതമായ തീരുമാനം കൈക്കൊണ്ട മുഖ്യമന്ത്രി, സംസ്ഥാന സർക്കാർ, പൊതുവിദ്യാഭ്യാസ വകുപ്പ് മന്ത്രി, ഉന്നത വിദ്യാഭ്യാസ വകുപ്പ് മന്ത്രി എന്നിവർക്ക് അവർ നന്ദി രേഖപ്പെടുത്തി.
അതേസമയം, പാലാ നഗരസഭയുടെ നേതൃത്വത്തിൽ പാലാ മുനിസിപ്പൽ ഓഫീസിന് മുന്നിൽ ലോകകപ്പിന്റെ സെമിഫൈനൽ, ഫൈനൽ മത്സരങ്ങളുടെ തത്സമയ സംപ്രേഷണം പൊതുജനങ്ങൾക്കായി ഒരുക്കിയിരുന്നു. കുട്ടികൾ, യുവാക്കൾ, സ്ത്രീകൾ, കുടുംബങ്ങൾ തുടങ്ങി നൂറുകണക്കിന് ഫുട്ബോൾ ആരാധകർ ഇവിടെ ഒത്തുകൂടി മത്സരം വീക്ഷിച്ചു. അർജന്റീനയുടെയും സ്പെയിനിന്റെയും ജഴ്സികൾ അണിഞ്ഞ ആരാധകർ ആവേശപൂർവം ടീമുകളെ പിന്തുണച്ചപ്പോൾ ഫുട്ബോൾ ആഘോഷത്തിന് പാലാ സാക്ഷിയായി.
ഫുട്ബോൾ കേരളത്തിന്റെ വികാരമാണെന്നും ലോകകപ്പ് പോലുള്ള ആഗോള കായികമേളകൾ കുട്ടികളിലും യുവജനങ്ങളിലും കായികസംസ്കാരവും കൂട്ടായ്മയും വളർത്താൻ സഹായിക്കുമെന്നും ദിയ ബിനു പറഞ്ഞു. വിദ്യാർഥികളുടെ അഭ്യർഥന മാനിച്ച് സർക്കാർ കൈക്കൊണ്ട ഇന്നത്തെ അവധി തീരുമാനം കായികരംഗത്തോടുള്ള കേരളത്തിന്റെ സ്നേഹത്തിന്റെയും വിദ്യാർഥികളോടുള്ള കരുതലിന്റെയും പ്രതീകമാണെന്നും അവർ അഭിപ്രായപ്പെട്ടു.
Latest News
